今年八月期間,香港正陷於疫情第三波最關鍵嘅時刻,一班前線醫護以生命奮力守護香港,而基層市民亦每日活於疫情嘅無形威脅之中。反觀鄰近國家於防疫工作嘅積極態度,香港政府嘅防疫措施不單千瘡百孔,亦對疫情控制毫無建樹,令香港人一次又一次錯失堵截疫情嘅良機。相信香港人一早已經對無能嘅特區政府心死,香港人只可以自救。

meMall早前響應陣地文化所發起嘅「與社區同行」物資捐贈行動,並聯同生命果培訓工作室,分別義務提供物資收集點及召集義工隊協助包裝物資,盼望能夠集結社區嘅力量,貫徹meMall一直堅信「如果每個人做多少少,其實就已經做咗好多」嘅信念。

陣地文化係香港本地成立嘅傳媒機構,亦都作為meMall嘅獨家媒體伙伴,致力將社會真相透過唔同嘅角度帶俾市民。面對八月不跌反升嘅疫情,陣地文化嘅義工決定針對本地社群,邀請同路人一齊籌集抗疫物資,真正做到「港人自救」。

meMall作為同路人嘅網上購物平台,當知道陣地文化需要物資收集點後,我哋決定開放顧客服務中心收集物資。另外,我哋亦即時於平台推出兩款價格相宜嘅抗疫物資包,希望可以借助meMall現有嘅網購渠道,為四方八面嘅同路人提供簡單方便嘅物資捐贈方式。最終,meMall一共收集到多達600個外科口罩、230枝酒精搓手液,以及各14枝抗抑菌免洗洗手液與口罩抗抑菌噴霧。

有賴各位同路人對社群嘅支持同關愛,今次行動收到數量頗多嘅物資。為咗方便轉交物資俾有需要嘅社群,今次生命果培訓工作室亦聯同一班義工,於工餘時間將部份物資重新包裝,如協助分裝大容量嘅酒精搓手液及外科口罩等,令物資更易於存放,同時令派發過程變得更順暢。

當所有物資準備就緒之後,最終沙田瀝源區議員 岑子杰 Jimmy Sham (Jimmy)一口答應我哋接受全部物資,並於稍後向當區居民公佈派發詳情。轉交物資嘅過程中,我哋當然把握機會同Jimmy了解吓佢地區工作嘅心得。相信大家都記得六月時,瀝源邨祿泉樓曾經出現數宗確診個案,Jimmy指當時衛生署同民政事務處未能夠為佢提供即時資訊以及抗疫支援。好彩當時有瀝源邨嘅食店義無反顧捐出漂白水,令居民無須四出搶購物資,再次印證社區資本難能可貴之處。

對於政府一直欠缺透明度嘅抗疫措施,一方面令前線醫護承受沉重壓力,亦都令香港持續面對疫情一波接一波嘅困局,最終苦了香港人。為咗守護自己心愛嘅社區,香港人必須繼續善用身邊嘅社會資源!港人自救!