「好希望趁而家仲可以借藝術打『擦邊球』嘅時候，用自己嘅能力記錄低呢兩年香港政府極力想要掩飾嘅事實。」

歷經反送中運動，白色恐怖濃罩社會，遊行、示威自由被打壓，漫畫家Hei同好多香港人一樣，都學識咗要「Be water」：當日寫滿訴求同願望嘅連儂牆進化成滿牆彩色嘅空白便利貼，曾經百萬人一齊高呼嘅口號如今變成咗不同嘅幾何圖形，而Hei就選擇以漫畫記錄低運動中嘅大小事件，繪畫成一幅幅看似隱晦，但真香港人必定會有所共鳴嘅插畫。

以藝術攻克政權偽術

曾經，言論同新聞自由係香港最引以自豪嘅核心價值。如今，記者查冊要承受被控虛假陳述嘅風險，外出採訪隨時要硬食催淚彈，訪問政府高官要提出夠mild嘅問題，只有直播警方記者會，報道政權眼中嘅「真相」先能夠保平安。要減慢真相被消失嘅速度，就先要令大眾主動關注社會事件，等政府難以喺短時間內堵住悠悠眾口。

「香港人其實好有彈性，有咩改變都好快可以應對到。」短短一年嘅時間，唔少香港人已經由以前只想吃喝玩樂嘅「港豬」搖身一變成為緊貼時事嘅手足。然而，每日面對住排山倒海，令人難以消化嘅即時新聞同衝突，換種表達方式或者會令人更容易記住香港呢兩年發生過嘅一切。

「用漫畫嘅形式講社會事件會比較易入口，吸引多啲人share出去，令更多人可以了解到香港發生緊咩事。」正因為呢個念頭，令Hei由去年開始就以香港發生嘅一點一滴為題材創作，721、831、101、警方記者會、連儂牆、年輕手足⋯⋯全部繪成一幅幅黑白插畫，定期喺IG上分享，縱然無咗猩紅嘅血跡，刺鼻嘅催淚煙，亦希望提醒香港人不能被政權嘅巧言令色而忘記手足沉重嘅付出。

努力現在　未來可期

縱然喺可見嘅將來，香港嘅前景未為樂觀，政府對言論自由以至藝術創作嘅打壓亦不容小覷，但Hei直言唔會放棄用畫筆為香港發聲，只係畫嘅嘢可能要比而家「再隱晦啲」。

「就客觀環境而言，香港嘅前景的確唔樂觀，但香港人亦會隨之而進步，好似喺今次運動之後，都多咗好多新思維，更多人願意認真思考唔同論調。」

漫畫在香港的生存之道

除咗用漫畫關注香港嘅未來發展，Hei早在運動以前，就已經經常繪畫不同漫畫，上載到社交平台同大眾分享，但並非每次都能如願令更多人欣賞自己嘅作品。「香港人睇創作者嘅作品都會比較mean，習慣批評多於欣賞。」當然，藝術嘅嘢好多時都係各花入各眼，但肆意評論嘅同時就經常都忽略每個作品都係創作者嘅心血結晶，往往令唔少香港漫畫家灰心氣餒。

同一時間，香港漫畫家亦要面對現實生計問題。「而家有咗Facebook，IG等嘅社交媒體，多咗好多人可以見到我哋畫嘅漫畫，但同時都令好多人認為漫畫以至係藝術都係『無價』。」喺網絡大行其道嘅年代，如果有想睇嘅漫畫大多都可以喺網上信手拈來，現今讀者會買實體甚或係電子版漫畫嘅次數可謂寥寥可數，變相令漫畫家直接可得嘅收入大大減少。為咗維持生計，Hei亦唯有邊做其他正職，喺空餘時間再畫漫畫。

「最理想嘅當然係大家都願意課金去睇有質素嘅漫畫啦，或者喺睇到自己中意嘅漫畫嗰陣多啲讚賞或者分享比朋友，都可以比到好多鼓勵創作者。」要改變香港社會對待藝術嘅風氣同態度，並非一朝一夕可以做到嘅事，但最少我哋每個人都可以由今日起學懂欣賞漫畫，唔再理所當然地認為所有創作都係「無價」。 如果你唔想香港高質漫畫家嘅才華被埋沒，下次睇漫畫嘅時候不妨多啲CLS啦！

⁣ 即刻用行動支持，買一本屬於香港人嘅繪本：HEI_7537